How to choose a niche for blog? What is a blogging niche? In Urdu (اردو)

بلاگ کی نیش کیا ہوتی ہے؟ بلاگ کی نیش کو کیسے منتخب کیا جاتا ہے؟

اس پوسٹ کے نیچے آپ کو ایک فائل ملے گی۔ اسے ڈاؤنلوڈ کر کے آپ اپنی نیش سیلیکٹ کرسکتے ہیں۔ پہلے یہ پوسٹ پوری پڑھ لیں۔

بلاگ کی نیش کیا ہوتی ہے؟

آسان لفظوں میں بتاؤں تو: بلاگ کی نیش بلاگ کا ٹاپک ہوتا ہے۔

ایک مثال ہے کہ آپ ایک کتاب لکھنا چاہتے ہیں اور آپ کو پتہ ہی نہیں ہے کہ کتاب کا موضوع کیا رکھنا ہے، تو کیا لکھیں گے؟ کتاب کا کوئی موضوع ہو گا، اس میں جو کچھ بھی لکھنا ہو گا اس کی پوری فہرست ہو گی۔ جن لوگوں کے لیے آپ کتاب لکھ رہے ہیں انہیں بھی پوری فہرست کتاب کے آغاز میں چاہئے تاکہ انہیں پتہ چل سکے کہ کتاب کا اپنا ٹاپک کیا ہے اور اس کی فہرست میں مزید کیا کیا شامل ہے۔

بالکل ایسے ہی بلاگ کا بھی ایک موضوع ہوتا ہے۔ میں نے دیکھا ہے آج کل بہت سارے بلاگ ایسے ہوتے ہیں جن کا کوئی موضوع نہیں ہوتا بلکہ جو بلاگر کے دل میں آتا ہے وہ لکھ دیتا ہے۔ کبھی آپ کہیں گھومنے گئے  تو اس جگہ کے بارے میں ایک بلاگ پوسٹ لکھ دی، کبھی کچھ کھانے گئے تو اس کھانے کے بارے لکھ دیا، کبھی بیمار ہوئے تو اس بیماری کی علامات اور علاج کے ساتھ ساتھ اچھی صحت پر کچھ لکھ دیا۔ یہ سب ایک جنرل بلاگ  کی طرح ہوتا ہے۔ ایسے بلاگ کمانے کی نیت سے نہیں بنائے جاتے بلکہ صرف لکھنے کا شوق پورا کرنے کے لیے بنائےجاتے ہیں۔

ایسے بلاگ کو ایک کتاب سمجھیں اور تصور کریں کہ کیا آپ ایسی کتاب کو پڑھنا چاہیں گے؟ ہر انسان کی سوچ مختلف ہوتی ہے۔ یہ ضروری نہیں جو کچھ آپ کو پسند ہو وہی باقی سب بھی پسند کریں۔ اگر کوئی ایک ٹاپک آپ منتخب کریں گے تو اس ایک ٹاپک پر تو لاکھوں کروڑوں لوگ متفق ہو سکتے ہیں مگر آپ چاہیں کہ جن پچاس ٹاپک پر آپ نے لکھا ہے وہ پچاس کے پچاس ٹاپک ہر پڑھنے والے کو پسند ہوں تو ایسا ممکن نہیں ہے۔

جو ریڈر جس ٹاپک کے متعلق آپ کے بلاگ کو پڑھنا پسند کرتا ہے وہ آپ کے بلاگ پر اس ٹاپک کے علاوہ کوئی اور چیز پڑھے گا تو جلد ہی آپ کے بلاگ کو چھوڑ کر جا سکتا ہے۔ جیسے میں اس پوسٹ کے بعد آپ کو اگلی پوسٹ میں بریانی بنانے کی ریسیپی سکھانے لگ جاؤں تو آپ کو کیسا لگے گا؟ برا لگے گا نا؟ بالکل ایسے ہی میری پسند ناپسند کچھ بھی ہو مگر میرے بلاگ کا ٹاپک ایک ہی رہے گا۔

ہاں! اس کے باوجود کچھ ایسے جنرل بلاگ بھی مشہور ہو جائے ہیں مگر وہ بہت بڑے لیول کے بلاگ ہوتے ہیں۔ بڑے لیول کے بلاگ پر رائٹرز کی پوری ٹیم ہوتی ہے جو مختلف ٹاپک پر لکھتے ہیں۔ وہ پیسے دے کر بھی آرٹیکل وغیرہ لکھوا لیتے ہیں۔ آپ نے صرف ایک ٹاپک کو ہی پکڑنا ہے جس پر آپ پوری توجہ کے ساتھ لکھ پائیں۔

کچھ چیزوں کو سب لوگ دلچسپی پڑھتے ہیں، مگر کچھ چیزیں صرف کاروباری لوگوں کے کام کی ہوتی ہیں جیسے کاروبار سے متعلق معلومات، کچھ معلومات صرف خواتین پڑھنا چاہتی ہیں اور کچھ صرف مرد۔ آپ کو ہر طرح سے پتہ ہونا چاہیے کہ آپ کس عمر کے لوگوں کےلیے، کس جنس کے لوگوں کے لیے اور کس علاقے کے لوگوں کے لیے بلاگ بنا رہے ہیں۔ کیا آپ کے بلاگ کو میل فی میل دونوں پڑھیں گے؟ کیا وہ صرف پاکستان میں پڑھاجائے گا یا باہر بھی؟ کس عمر کے لوگوں کو آپ مخاطب کریں گے؟ یہ تمام سوالات آپ اپنے آپ سے پوچھ کر اپنے بلاگ پر کام کریں۔

بلاگ نیش اور افیلیٹ مارکیٹنگ:

افیلیٹ مارکیٹنگ میں کامیابی پانی ہے تو بلاگ  بکھرا ہوا نہیں ہونا چاہیے بلکہ کسی ایک خاص موضوع کے گرد اس بلاگ کی تمام پوسٹیں گھومتی رہنی چاہئیں۔ جب آپ کے بلاگ کا ریڈر یہ جان لے گا کہ یہ بلاگ میری ضرورت اور دلچسپی کے فلاں موضوع پر ہے، اور اس کی آنے والی پوسٹ بھی میرے کام کی ہوں گی تو وہ اسے ریگولر پڑھنے آئے گا۔ اگر سارا لکھا ہوا میٹیریل بکھرا ہوا ہو گا تو کوئی بھی پسند نہیں کرے گا۔

آپ جس فیلڈ میں ماہر ہیں، اسی فیلڈ کے بارے میں آپ زیادہ سے زیادہ معلومات لوگوں کے ساتھ اپنے بلاگ کے ذریعے شیئر کریں۔ آپ کے ریگولر ریڈر بھی وہی سب جاننا چاہیں گے جو آپ کو معلوم ہے۔

ایک ایسابلاگ جو ایک ہی انسان کا لکھا ہوا ہوتا ہے اور مختلف ٹاپکس پر لکھا جاتا ہے، وہ کسی ایک مسئلے کو گہرائی سے بیان نہیں کرتا۔ ایسے بلاگ پر صرف وہی پوسٹ اچھی لکھی جائے گی جس پوسٹ کے ٹاپک پر بلاگر کا بہت زیادہ تجربہ ہو گا۔ باقی سب کاپی پیسٹ میٹیریل لگے گا۔

بلاگ کی نیش کیسے منتخب کی جائے؟

جب بلاگ بنانے کے لیے نیش منتخب کرنے کی بات آتی ہے تو ہمارے ذہن میں کئی سارے ٹاپک ایک ساتھ آ جاتے ہیں۔ ایک انسان کی دلچسپی بہت سارے ٹاپک میں ہوتی ہے۔ کوئی ایک نیش سیلیکٹ کرنا بہت مشکل ہو جاتا ہے۔

انسان کی سائیکالوجی کچھ ایسی ہےکہ وہ جاننا تو سب کچھ چاہتا ہے مگر کسی ایک فیلڈ میں دماغ نہیں لگانا چاہتا۔ آپ کسی فری لانسر سے پوچھیں گے کہ آپ کو کیا کام آتا ہے؟ وہ کہے گا مجھے ویب ڈیزائننگ آتی ہے، گرافک ڈیزائننگ آتی ہے، مارکیٹنگ آتی ہے، بزنس گائیڈ بھی ہوں، ٹیچر بھی ہوں، فری لانس میں بھی ماہر ہوں، ڈیٹا انٹری آپریٹر بھی ہوں اور مایئکروسافٹ ورڈ ایکسل میں تو بہت زیادہ ایکسپرٹ ہوں۔ اب بات تو اس کی ٹھیک ہے کہ اسے یہ کام آتے ہیں مگر کیا آپ اسے کسی ایک فیلڈ کا ماہر کہنا پسند کریں گے؟ یا ایک چھوٹی سی مثال اور ہے کہ ایک جنرل ڈاکٹر اور ایک سپیشلسٹ میں بہت فرق ہوتا ہے۔ آپ کو سر درد ہے تو جنرل ڈاکٹر کے پاس جائیں گے، مگر آپ کے سر کا درد ختم ہی نہیں ہو رہا تو وہ ڈاکٹر بھی آپ کو کسی نیورولوجسٹ کے پاس جانے کا کہے گا۔

آپ کو بھی اپنے اندر دیکھنا ہے کہ پوری لائف آپ نے کون سی فیلڈ میں اچھا نالج اکٹھا کیا ہے۔ کہنے میں یہ بہت آسان لگ رہا ہے مگر جب آپ پریکٹیکلی بلاگنگ کرنے بیٹھیں گے تو آپ اپنے اندر شاید ایسا کچھ بھی نہ ڈھونڈ پائیں۔ کیوں کہ میں نے انسان کی سائیکالوجی بتائی ہے کہ وہ سب کچھ تھوڑا تھوڑا جان لیتا ہے مگر کسی بھی چیز کی گہرائی میں اتنی آسانی سے نہیں جاتا۔ آپ کے پاس بھی ہزاروں تجربات ہوں گے، ریلیشنشپ، موٹیویشن، پرائیویٹ نوکری کے مسائل، بزنس کے مسئلے اور پڑھائی کے متعلق آپ کے پاس کافی کچھ لکھنے کو ہو گا۔ لیکن جس فیلڈ میں خاص مہارت اور تجربہ ہو گا صرف اسی پر ایک کامیاب بلاگ بنانا ممکن ہو سکے گا۔

شاید آپ کوکنگ کے ماہر ہوں، ٹیچنگ میں کئی سال لگا چکے ہوں، ایک مکینک ہوں، الیکٹریشن ہوں یا کوئی بھی ٹیکنیکل کام کرتے ہوں تو آپ کو اس فیلڈ کا اسپیشل نالج ہوگا اور تجربہ بھی ہو گا۔ اسی ٹاپک پر آپ لوگوں کے ساتھ بہترین نالج شیئر کر سکیں گے۔

مثال کے طور پر اگر میں بہت زیادہ ٹریول کرتا ہوں، مجھے کسی نئی جگہ جانا پڑتا ہے تو میں پہلے اس جگہ کے متعلق انٹرنیٹ سے معلومات لیتا ہوں۔ ٹریول بلاگ لکھنے والے وہ لوگ جو وہاں جا چکے ہیں یا اس جگہ کے بارے کافی تفصیل سے جانتے ہیں، ان کے بلاگ یا یوٹیوب چینل وغیرہ پر مجھے اس جگہ کے بارے میں سب معلومات مل جاتی ہیں۔ ان جگہوں کے بارے میں معلومات دینا ہی ان کی نیش ہوتی ہے۔ اگر مجھے اس علاقے میں رینٹ پر جگہ چاہئے تو میں انہی کے افیلیٹ لنک کے ذریعے بکنگ کروا لیتا ہوں جس سے انہیں کمیشن مل جاتا ہے اور میرا کام ہو جاتا ہے۔

اپنی پسند کے 25 ٹاپک ذہن میں لائیں اور پھر ایک سیلیکٹ کریں۔ مگر کیسے؟

1۔ انٹرنیٹ پر جائیں اور اپنی پسند کے متعلق مختلف بلاگ کو گوگل پر سرچ کریں۔ سب کو باری باری کھول کر پڑھیں اور نوٹ کریں کہ وہ کیسے لکھے گئے ہیں۔ چاہے جتنے بھی ٹاپک آپ کو پسند ہوں، آپ تمام پسندیدہ ٹاپک کو گوگل پر سرچ کر کے ان کے متعلق مختلف بلاگ پڑھیں۔ آپ کو اندازہ ہو جائے گا کہ کس ٹاپک کے بلاگ پر آپ زیادہ دلچسپی لے رہے ہیں۔

2۔ دو چار دن اپنی پسند کے ہر ٹاپک پر مختلف بلاگ دیکھ لیں اور یہ فیصلہ کریں کہ اگر آپ کو ان میں سے کسی ٹاپک پر لکھنا ہے تو وہ کون سا ہونا چاہئے۔

آپ اپنی پسند کے بیس پچیس ٹاپک میں سے دس  ٹاپک منتخب کر لیں۔ کوئی مسئلہ نہیں۔ اگلے مرحلے میں پھر تین کام کریں۔

1۔ جو دس ٹاپک آپ نے منتخب کیے ہیں، ان میں سے پانچ ایسے ٹاپک جن کی خرید و فروخت کے لیے پراڈکٹس بہت زیادہ ہیں، انہیں الگ کر لیں۔ آپ کا مقصد بھی پراڈکٹ بکوانا ہے، اس لیے آپ وہی فیلڈ منتخب کریں گے جس میں آپ کے پاس بیچنے کے لیے بھی بہت کچھ ہو گا اور خریداروں کی بھی کمی نہیں ہو گی۔

2۔ اب دیکھیں کہ ان پانچ ٹاپک میں سے ایسے تین کون سے ٹاپک ہیں جو زیادہ مشہور ہیں۔ آپ نے اکثر انہی کے متعلق پراڈکٹ کے اشتہارات بھی دیکھے ہوں۔ یعنی آپ ان پانچ میں سے تین ٹرینڈنگ ٹاپک چن لیں۔

3۔ اب جو تین ٹاپک آپ نے نکال لیے ہوں گے ان میں سے کسی ایک کو پکڑ لیں اور باقی کو چھوڑ دیں۔ اگر فیصلہ مشکل ہے تو یہ سوچ لیں کہ ان میں سے ایسا کون سا ٹاپک ہے جس پر لکھتے وقت آپ بور بھی نہیں ہوں گے اور ان کے بارے میں انٹرنیٹ پر اچھی معلومات بھی مل جائیں گی۔ کوئی بھی ایک ٹاپک اپنے ذہن میں فیصلہ کر کے منتخب کر لیں اور پھر دوسرے ٹاپک جتنے بھی اہم ہوں انہیں الگ کر دیں۔

ایک بات اور بہت اہم ہے کہ ہمیشہ ایک ٹاپک ہی سب کچھ نہیں ہوتا بلکہ اس میں باقی کے ٹاپک بھی شامل ہوتے ہیں مگر فوکس ایک پر ہی ہوتا ہے۔ جیسے افیلیٹ مارکیٹنگ کرنے والوں کو سوشل میڈیا مارکیٹنگ، سرچ انجن مارکیٹنگ، بلاگنگ اور کانٹنٹ رائیٹنگ بھی کرنی پڑتی ہے۔ آپ باقی ٹاپکوں کو اپنی نیش کے لیے مددگار ٹاپک سمجھ لیں اور ضرورت کے وقت انہیں بھی تھوڑا تھوڑا شامل کرتے رہیں۔

نیش سیلیکٹ کرنے کے لیے ایک اہم ریسورس فائل:

میں نے آپ کی آسانی کے لیے ایک ایکسل فائل بنائی ہے۔ اس میں آپ کو نیش سیلیکٹ کرنے میں بہت آسانی ہو جائے گی۔ آپ نے صرف اس فائل میں اپنی پسند کے ٹاپک لکھنے ہیں اور ہدایات پر عمل کر کے ایک نیش کو سیلیکٹ کرنا ہے۔

فائل ڈاؤن لوڈ کریں اور نیش سیلیکٹ کریں۔

{getDownload} $text={Download File} $size={12KB}

اس طرح کی مزید آنے والی فائلز اور قیمتی میٹیریل حاصل کرنے کے لیے میرے بلاگ کی ممبرشپ خرید لیں، کیونکہ ممبرز کے لیے پریمیئم فائلز رکھی جائیں گی جو آپ کو آن لائن بزنس شروع کرنے کے لیے آسانی فراہم کریں گی۔

اگلی پوسٹ: بلاگ کی تین اقسام - افیلیٹ مارکیٹنگ اور بلاگنگ؟

پچھلی پوسٹ: افیلیٹ مارکیٹنگ کیا ہے؟ افیلیٹ بلاگ سے کیسے کمایا جاتا ہے؟

All Posts of This Series

View All Series